Om Swastyastu

Maka purwakaning atur, lugrayang titiang ngaturang rasa angayu bagia mantuka ring Ida Sang Hyang Parama Kawi, riantukan sangkaning asung kertha wara nugraha Ida, titiang, asapunika taler Ida Dane sareng sami prasida ngamiletin pamargi Bulan Bahasa Bali warsane puniki.

Kawentenan Bulan Bahasa Bali puniki kawiwilin sangkaning kawentenan :
1.    Perda No. 1 Tahun 2018 indik Bahasa, Aksara lan Sastra Bali.
2.    Pergub No. 80 Tahun 2018 indik Perlindungan dan Penggunaan Bahasa, Aksara, dan Sastra Bali serta Penyelenggaraan Bulan Bahasa Bali.
Sangkaning kawentenan dasar hukum punika mawinan ring soang-soang desa/kelurahan, sekolah, miwah kantor pemerintahan mangda prasida ngarya parikrama mangda sida ajeg bahasa Baline. Bantang Bulan Bahasa Baline warsane puniki wantah “Danu Kerthi: Gitaning Toya Ening”, “Lingga Stana Basa, Aksara miwah Sastra Mapaiketan ring Kramaning Ngawerdiang Danu Pinaka Witning Amertha Sarwa Prani.”

Antuk punika ring SMA Negeri 3 Amlapura kalaksanayang parikrama wimbakara sane kamiletin olih para sisia, minakadi: Dharma Wacana, Mageguritan, Mawirama, Masatua Banyol, Ngwacen Puisi Bali Anyar, Nyurat Lontar, Ngarya Baligrafi, miwah Video Nglestariang Palemahan. Sami parikrama puniki kalaksanayang daring antuk makarya video. Kalaksanayang daring santukan kawentenan jagate sakadi puniki kantun wenten gering Covid-19 varian Omicron, manut Surat Edaran saking Gubernur Bali No. 8352  warsa 2021 sane madaging indik Penyelenggaraan Bulan Bahasa Bali IV Warsa 2022. Yadiastun kalaksanayang daring nenten ngirangin pabuat ipun ri sajeroning ngrajegang bahasa Baline. 

Parikrama Bulan Bahasa Bali puniki mungguing eedan parikramannyane wantah: 

1. tanggal 7-16 Februari 2022 kalaksanayang Pendaftaran Pamilet Wimbakara, 
2. tanggal 11 Februari 2022 kalaksanayang Technical Meeting Wimbakara sane kalaksanayang,
3. tanggal 17 Februari 2022 Pamungkah Bulan Bahasa Bali miwah Penilaian Wimbakara sane kalaksanayang, 
4. tanggal 18 Februari 2022 Pamuput Bulan Bahasa Bali miwah Nyukserahang Hadiah ri sajeroning pamilet sane polih jayanti.

Tetujon Bulan Bahasa Bali puniki, tan wenten sios makasarana ngwerdiang miwah nglimbakang budaya Bali sane marupa basa, sastra lan aksara Bali, ngicenin galah para alit-alit, para yowana nyinahang angga ring sajeroning kawagedan indik basa, sastra lan aksara Bali, taler pinaka genah ngrereh utawi nincapang kaweruhan para alit-alit lan yowana indik basa, sastra lan aksara Bali.

Om Santih Santih Santih Om

Silahkan Download Foto Disini

TeamCreativeTrismapura